O‘zbekiston xalqaro pasportlar reytingida o‘z pozitsiyasini yaxshiladi. Bu haqida Upl.uz xabar berdi.
Konsalting kompaniyasi Henley & Partners tomonidan tuzilgan reytingda mamlakat 74-o‘rindan 72-o‘ringa ko‘tarildi va ushbu o‘rinni Mozambik bilan bo‘lishdi. Hozirda O‘zbekiston fuqarolari dunyoning 62 davlatiga viza talab qilinmaydigan yoki kelib tushgandan keyin viza olish imkoniyati bilan sayohat qilishlari mumkin.
Eng kuchli pasportlar reytingida birinchi o‘rinni Singapur egallaydi. Singapur fuqarolari 193 davlatga vizasiz kirish huquqiga ega.
Eng past o‘rinda esa Afg‘oniston joylashgan bo‘lib, uning pasport egalari atigi 25 davlatga vizasiz kirish huquqiga ega. Reytingdagi ijobiy o‘zgarish O‘zbekistonning xalqaro maydondagi obro‘sining oshgani va hukumatning diplomatik aloqalarni mustahkamlash hamda boshqa davlatlar bilan munosabatlarni rivojlantirish borasidagi sa’y-harakatlari natijasidir.
Bu esa mamlakat fuqarolari uchun chet elga sayohat qilishda ko‘proq erkinlik va kamroq ma’muriy to‘siqlar mavjudligini bildiradi.
