Sanoat, radiatsiya va yadro xavfsizligi qo‘mitasi matbuot xizmatida minorali kranning qulashiga oid rasmiy bayonot e’lon qilindi. Bu haqida Upl.uz xabar berdi.
Joriy yilning 8 sentyabr kuni soat taxminan 16:10 da Toshkent shahrining Chilonzor tumanidagi Tirsakobod ko‘chasida joylashgan “Dumbirobod Siti” qurilish maydonchasida favqulodda hodisa yuz berdi. Minorali kranni o‘rnatish jarayonida u qulab tushdi.
Dastlabki ma’lumotlarga ko‘ra, kran poydevorga mustahkam bog‘lanmaganligi sababli, keyingi qismlarini o‘rnatish uchun harakatlanayotganda egilib, poydevorga bog‘lanmagan ikkita tayanch qismi yerga yiqildi. Ushbu hodisa natijasida kran kabinasida bo‘lgan kran operatori halok bo‘ldi.
Shuningdek, ikki nafar ishchi turli darajadagi jarohatlar olib, shifoxonaga yotqizildi. Toshkent shahar sanoat, radiatsiya va yadro xavfsizligi qo‘mitasi boshqarmasi tomonidan hodisaning barcha tafsilotlarini aniqlash va sabablari yuzasidan ekspert-texnik komissiya tuzildi.
Hozirda tergov harakatlari olib borilmoqda. Ushbu holat qurilish sohasida xavfsizlik qoidalariga qat’iy rioya etishning muhimligini yana bir bor ta’kidlaydi.
