Bosh prokuratura huzuridagi Departament matbuot xizmati tomonidan soxta aroq savdosiga chek qo‘yilgani haqida ma’lum qilindi. Bu haqida Upl.uz xabar berdi.
Samarqand viloyati bo‘yicha Departament xodimlari tomonidan maxsus tezkor tadbir o‘tkazildi. Tadbir davomida Samarqand tumani “Parrandachilik” MFYdagi “G.A.” MChJga qarashli do‘konda tekshiruv o‘tkazildi.
Tekshiruvda ushbu do‘konda noqonuniy tayyorlangan soxta alkogolli ichimliklar savdosi amalga oshirilayotgani aniqlanib, jami 4218 shisha soxta aroq hamda 1720 quti sigaret hujjatsiz holatda musodara qilindi. Musodara qilingan tovarlarning umumiy qiymati 134,7 million so‘mni tashkil etdi.
Soxta aroq shishalariga qalbaki aksiz markalari yopishtirilgani qayd etildi. Ushbu holat bo‘yicha O‘zbekiston Respublikasi Jinoyat kodeksining “Qalbaki pul, aksiz markalari yoki qimmatli qog‘ozlarni tayyorlash va sotish” hamda “Etanol spirtini, alkogol va tamaki mahsulotlarini noqonuniy ishlab chiqarish yoki savdosi” moddalari bo‘yicha jinoyat ishi qo‘zg‘atildi.
Hozirda tergov harakatlari olib borilmoqda.
