Yaqinda Xatirchi tuman hokimi Umidjon Adizovning Navoiy viloyati Xatirchi tumanida yashovchi yahudiy millatiga mansub shaxslar guruhi bilan bo‘lib o‘tgan samimiy uchrashuvi ijtimoiy tarmoqlarda keng muhokamalarga sabab bo‘ldi. Bu haqida Upl.uz xabar berdi.
Shunga javoban, Xatirchi tuman hokimiyati rasmiy bayonot bilan chiqdi. Bayonotda ta’kidlanishicha, Xatirchiga tashrif buyurgan yahudiylar bizning qadimiy vatandoshlarimiz hisoblanadi.
O‘zbekiston hududida 130 dan ortiq millat va elat vakillari, shuningdek, 16 ta rasmiy diniy konfessiyalar faoliyat yuritmoqda. Ulardan biri ham yahudiy jamoalari hisoblanadi.
Xatirchiga kelgan xorijdagi yahudiylar asosan Buxoro yahudiylari bo‘lib, ular uzoq yillardan beri o‘z ildizlarini izlab kelmoqda. Ushbu mehmonlar o‘z ajdodlari yashagan hududning tarixiy va madaniy merosini o‘rganish hamda ular uchun muqaddas bo‘lgan joylarni ziyorat qilish maqsadida kelishgan.
Tuman hokimi bilan uchrashuv esa o‘zbek xalqining mehmondo‘stligi va bag‘rikengligini namoyon etgan holda tashkil etildi. Hokimiyat matbuot xizmati bayonotida bular ta’kidlangan.
