Taganrog hokimiyati Rossiyadan O‘zbekistonga va Qozog‘istonga engil motorli SP-30 samolyotlarini yetkazib berish haqida ma’lumot berdi. Bu haqida Upl.uz xabar berdi.
Ushbu samolyotlar Rossiyaning Taganrog shahridagi korxonada yig‘iladi. Rostov viloyati Investitsion rivojlanish agentligi bosh direktori Igor Burakov so‘nggi 12 oy ichida Taganrog korxonasi 13 ta SP-30 samolyotini ishlab chiqqanini, so‘nggi ikki yil ichida esa umumiy hisobda 20 dan ortiq samolyot tayyorlanganini ta’kidladi.
Ushbu samolyotlar hozirda O‘zbekiston va Qozog‘istonga eksport qilinmoqda. Joriy yil bahorida O‘zbekistondagi “Navoiy” erkin iqtisodiy zonasida SP-30 samolyotlarini ishlab chiqarishni yo‘lga qo‘yish rejalari e’lon qilindi.
Kutilishicha, birinchi O‘zbekistonda ishlab chiqarilgan samolyot kuzda yig‘ish liniyasidan tushadi. SP-30 yengil, ikki o‘rinli samolyot bo‘lib, 2003 yildan beri ishlab chiqarilmoqda.
Uning asosiy xususiyati qisqa masofaga uchish va qo‘nish imkoniyatidir, bu esa qisqa va tayyorlanmagan maydonchalarda foydalanishga imkon beradi. Samolyot 100 ot kuchiga ega dvigatel bilan jihozlangan.
SP-30 qishloq xo‘jaligida, o‘quv parvozlarida, aerofotosuratga olish va turizmda keng qo‘llaniladi.
👍 0❤️ 0😂 0😢 0😡 0
