Rossiya Federatsiyasida 37 yoshli O‘zbekiston fuqarosi Chinoraxon Maxsudova haqidagi ma’muriy ish yakunlandi. Bu haqida Upl.uz xabar berdi.
Ushbu holat 2025 yil 12 fevral kuni Volgograd shahridagi “Gumrak” xalqaro aeroportida yuz berdi. Maxsudova Dubaydan kelgan aviatsiya reysi bilan Rossiyaga kirganida bojxonadan o‘tishda “yashil yo‘l”ni tanladi, bu yo‘l bojxonada deklaratsiya talab qilinmaydigan yo‘lovchilar uchun mo‘ljallangan edi.
Biroq, ikki sumkasini tekshirish vaqtida bojxonachilar uning yukida deklaratsiya qilinmagan tijorat mahsuloti — inson sochlarining katta partiyasini topdi. Tekshiruvda jami 222 bog‘lam tabiiy inson sochlari aniqlandi.
Ularning umumiy og‘irligi 40,9 kilogrammni tashkil etdi. Sochlarning bozor qiymatini aniqlash uchun ekspertiza o‘tkazildi va ularning Rossiya bozoridagi qiymati 4 million 363 ming 678 rublga tengligi tasdiqlandi.
Sud jarayonida Chinoraxon Maxsudova sochlarni olib kirganligini tan oldi va ularni Moskva shahridagi go‘zallik salonida tijorat maqsadlarida ishlatish niyatida ekanligini bildirdi. Shuningdek, u bojxonadan o‘tish qoidalari bilan tanishmaganini va tijorat mahsulotlarini deklaratsiya qilish majburiyatini bajarmaganini tan oldi.
Sud ish sharoitlarini hisobga olib, uning harakatlarini ma’muriy huquqbuzarlik deb topdi. Jazolar sifatida deklaratsiya qilinmagan barcha sochlar musodara qilindi va ularning og‘irligi 40 kilogrammdan oshgan partiya Rossiya davlatiga topshirildi.
Ushbu sud qarori ma’muriy ish bo‘yicha yakuniy hisoblanadi. Inson sochlari bozori milliardlab dollarlik sanoat bo‘lib, asosiy xomashyo eksport qiluvchilari sifatida Hindiston va Xitoy hisoblanadi.
U yerda sochlar ko‘pincha ibodatxonalarida diniy marosimlarda hadya sifatida yig‘iladi va keyinchalik dunyo bo‘ylab pariklar yasash hamda sochlarni uzunlashtirishda foydalanish uchun sotiladi.
