2025 yil 1 iyul holatiga ko‘ra, O‘zbekistonda faoliyat yuritayotgan kichik korxonalar soni (fermer va dehqon xo‘jaliklarisiz) jami 393 359 tani tashkil etdi. Bu haqida Upl.uz xabar berdi.
Bu ma’lumotlar O‘zbekiston Respublikasi Davlat statistika qo‘mitasi tomonidan taqdim etilgan. Yil boshidan buyon kichik biznes subyektlari soni 35 243 taga oshib, mamlakatdagi kichik biznesning barqaror o‘sishini ko‘rsatmoqda.
Mintaqalar kesimida tahlil qilinganda, eng ko‘p kichik korxonalar soni bilan Toshkent shahri yetakchilik qilmoqda. Umumiy kichik tadbirkorlik subyektlarining 23,4 foizi, ya’ni 91 916 tasi aynan Toshkent shahrida joylashgan.
Hududlar bo‘yicha faol kichik korxonalar soni quyidagicha taqsimlangan: Toshkent shahri – 91 916 ta, Toshkent viloyati – 38 140 ta, Samarqand viloyati – 34 124 ta, Farg‘ona viloyati – 30 817 ta, Qashqadaryo viloyati – 24 658 ta, Buxoro viloyati – 24 335 ta, Xorazm viloyati – 22 709 ta, Andijon viloyati – 21 890 ta, Namangan viloyati – 21 648 ta, Surxondaryo viloyati – 21 053 ta, Qoraqalpog‘iston – 18 915 ta, Navoiy viloyati – 17 766 ta, Jizzax viloyati – 15 492 ta hamda Sirdaryo viloyati – 9 896 tani tashkil etadi. Ushbu ko‘rsatkichlar kichik tadbirkorlik sohasining mamlakat bo‘ylab tengsiz rivojlanishini aks ettiradi.
