Talent Show mualliflik huquqini buzganligi aniqlandi
O‘zbekiston Respublikasi Adliya vazirligi “Ovoz” loyihasi tashkilotchisi MChJ “Talent Show” kompaniyasiga musiqiy asardan ruxsatsiz foydalanilgani sababli rasmiy ogohlantirish berdi. Bu haqida Upl.uz xabar berdi.
Masala xalq artisti Sherali Juraevga tegishli “Qora ko‘zli sanamjon” qo‘shig‘ining fonogrammasi “The Voice of Uzbekistan” nomli rasmiy YouTube-kanalida ommaga taqdim etilgani bilan bog‘liq bo‘ldi. Tekshiruv jarayonida mualliflik huquqi egasidan yoki uning vakillaridan bunday foydalanish uchun ruxsat olinmagani aniqlangan.
Shu bilan birga, “Talent Show” rahbariyati vazirlik tekshiruvini tugashidan oldin yuzaga kelgan qonunbuzarlikni bartaraf etdi. Bu holat yumshoqroq chorani – rasmiy ogohlantirish berishni ta’minladi, kompensatsiya undirish jarayoni boshlanmadi.
Vazirlik vakillari ommaviy axborot vositalari va kontent foydalanuvchilariga mualliflik huquqini buzishning jiddiy oqibatlari haqida eslatib o‘tmoqda. Amaldagi “Mualliflik huquqi va unga aloqador huquqlar to‘g‘risida”gi qonunga ko‘ra, bunday qonunbuzarliklar uchun 20 dan 1000 bazaviy hisoblash miqdorigacha kompensatsiya to‘lash ko‘zda tutilgan.
Bu choralar intellektual mulk huquqlarining qat’iy himoyasini ta’minlashga qaratilgan. Vazirlik televideniye va radiokanallar, shuningdek, boshqa kontent foydalanuvchilarini qonun talablariga qat’iy rioya qilishga chaqiradi.
Mualliflik huquqi buzilishi holatlari yuzaga kelganda, fuqarolar va tashkilotlar “1008” ishonch telefoni yoki [email protected] elektron manzili orqali murojaat qilishlari mumkin. O‘zbekistonda mualliflik huquqi, mualliflik nomi va obro‘sini himoya qilish huquqi asar jamoat mulkiga o‘tgandan keyin ham doimiy saqlanib qoladi.
Bu qonun mualliflarning huquqlarini doimiy himoya qilishni ta’minlaydi.
