Toshkentda zamonaviy «O'zbekfilm» kino shaharchasi barpo etiladi
O‘zbekiston poytaxtidagi O‘zbekfilm kinostudiyasiga qarashli 10 gektar maydonda zamonaviy O‘zbekfilm kino shaharchasi barpo etiladi. Bu haqda One.uz xabar beradi.
Mazkur loyiha haqida Prezident Shavkat Mirziyoyevning kino sanʼati namoyandalari bilan o‘tkazgan muloqoti davomida eʼlon qilindi. Yangi majmua kino sanoati uchun zarur bo‘lgan barcha xizmatlarni o‘zida mujassam etgan yagona industrial klaster vazifasini o‘taydi.
Ushbu tashabbus milliy kinematografiyani yangi bosqichga olib chiqish va soha xodimlarining samarali ishlashi uchun zarur sharoitlarni yaratishga qaratilgan. Loyiha bosqichlari va texnik imkoniyatlar Rejaga ko‘ra, kino shaharchasi tarkibida eng so‘nggi texnologiyalar bilan jihozlangan dublyaj va ovozlashtirish markazi qad rostlaydi.
Kelgusi ikki oy davomida tajribali loyiha tashkilotlari jalb etilib, majmuaning bosh rejasi va loyiha-smeta hujjatlari to‘liq ishlab chiqiladi. Qurilish ishlarining asosiy bosqichi 2027-yilning mart oyidan boshlanishi ko‘zda tutilgan.
Shu bilan birga, sohada samaradorlikni oshirish maqsadida kino tizimidagi foydalanilmayotgan davlat aktivlarini ochiq savdoga chiqarish bo‘yicha tegishli ko‘rsatmalar berildi. Ijodkorlarni ijtimoiy himoya qilish choralari Davlat rahbari bilan uchrashuvda kinoijodkorlarning ijtimoiy sharoitlarini yaxshilash masalasiga alohida to‘xtalib o‘tildi.
Xususan, Toshkent viloyatining Quyi Chirchiq tumanida joylashgan Ko‘hinur sihatgohi to‘liqligicha kino sohasi vakillari ixtiyoriga beriladigan bo‘ldi. Yaqinda zamonaviy andozalar asosida taʼmirlanib, zarur jihozlar bilan taʼminlangan ushbu maskan ijodkorlarning dam olishi va yangi asarlar ustida ishlashi uchun xizmat qiladi.
Bundan tashqari, soha xodimlarining salomatligini tiklash bo‘yicha ham yangi tizim joriy etiladi. Unga ko‘ra, har yili kino sohasida faoliyat yuritayotgan kamida 300 nafar mutaxassisga mamlakatimizdagi turli sihatgohlarda bepul dam olish va davolanish uchun maxsus yo‘llanmalar ajratiladi.
Bunday choralar nafaqat kino sifatini oshirish, balki soha fidoyilarini rag‘batlantirishda ham muhim ahamiyat kasb etadi.
