Buxoroda ilk biyennale san’at ko‘rgazmasi ochildi
Buxoro shahrida 5 sentyabrdan 20 noyabrgacha ilk Buxoro biyennalesi bo‘lib o‘tadi. Bu haqida Zamin.uz xabar berdi.
Ushbu yirik tadbir boy tariximiz, milliy an’analarimiz va asrab-avaylab kelayotgan hunarmandchiligimizning noyob namoyishi hisoblanadi. Prezident administratsiyasi rahbari Saida Mirziyoyeva ta’kidlaganidek, biyennale milliy g‘ururimiz va davlatchiligimizning muhim tayanchi sifatida tashkil etilmoqda.
Buxoro biyennalesi zamonaviy va amaliy san’at ko‘rgazmasi bo‘lib, unda rassomlar, hunarmandlar, oshpazlar va shoirlar qadimiy merosimizni zamonaviy tasvir va ifodalar bilan boyitmoqda. Tadbir jahon hamjamiyatining katta e’tiborini qozonib, san’atga qiziqish uyg‘otmoqda hamda eng iste’dodli ijodkorlarni o‘ziga jalb qilmoqda.
Biyennale doirasida zamonaviy rassomlar bilan suhbatlar, musiqiy chiqishlar, bosh oshpazlar uchrashuvlari, hunarmandlar tomonidan mahorat darslari, san’at tarixi simpoziumi va she’riy dasturlar tashkil etiladi. Tadbirda Diana Kempbell, Laylo Gohar, Subodh Gupta, Karsten Hoyeller, Jeong Kvan, Yelena Reygadas va Tavares Strahan kabi xalqaro miqyosdagi san’atkorlar ishtirok etadi.
Bu kabi xalqaro ahamiyatga ega loyihalar orqali O‘zbekiston o‘zining noyob brendiga ega bo‘lib, ijod va ilhom maskaniga aylanmoqda. Buxoro biyennalesi mamlakatimizning madaniy merosini dunyo miqyosida yanada keng targ‘ib qilishga xizmat qiladi.
