5 sentyabr kuni o‘zbek estradasining sevimli xonandasi Muhriddin Xoliqovning tavalludining 66 yilligi nishonlandi. Bu haqida Zamin.uz xabar berdi.
U «Qishloqdagi qiz», «Bu dunyo» va «Uzatamiz» kabi ko‘plab mashhur qo‘shiqlarning ijrochisi sifatida tanilgan. Shu munosabat bilan muxlislar uchun san’atkorning repertuari asosida qiziqarli test tayyorlandi.
Muhriddin Xoliqov 1959-yil 5 sentyabrda Namangan shahrida san’atkorlar oilasida tug‘ilgan. Bolaligidan musiqa va qo‘shiq kuylashga qiziqqan u, akkordeon va rubob asboblarida ham yaxshi ijro etgan.
Otasi unga san’at yo‘lida xizmat qilishni doimo eslatgan. Katta sahnaga u ilk bor «Parizod» qo‘shig‘i bilan chiqdi.
Har bir qo‘shig‘i o‘ziga xos va boshqacha bo‘lishiga katta e’tibor bergan. Kunining ko‘p vaqtini qo‘shiq yozishga sarflagan, bo‘sh vaqtlarida esa futbol bilan shug‘ullanib, charchoqni yenggan.
Muhriddin Xoliqov Sherali Jo‘rayevning shogirdi bo‘lib, Ozodbek Nazarbekov, Abdulla Qurbonov va Anvar Sanayev kabi san’atkorlarning ustozi ham hisoblanadi. U «Laylim», «Go‘zalim», «Besh kunlik dunyo», «Boqma», «Nozanin» va «Qizg‘aldog‘im» kabi ko‘plab mashhur qo‘shiqlarni kuylagan.
Faoliyati davomida yigirmaga yaqin konsert dasturlarini taqdim etgan, ularning eng oxirgisi 2000-yilda bo‘lib o‘tgan. Afsuski, Muhriddin Xoliqov 2001-yil 21 noyabrda hayotdan ko‘z yumgan.
Uning ijodi o‘zbek estradasida o‘chmas iz qoldirdi.
👍 0❤️ 0😂 0😢 0😡 0
