Isroilda falastinlik bola haqidagi film mukofotlandi
Isroilda falastinlik bolaning hayotidan hikoya qiluvchi “Dengiz” filmi mamlakatning nufuzli “Ofir” mukofotini qo‘lga kiritib, yilning eng yaxshi filmi deb e’tirof etildi. Bu haqda Zamin.uz xabar berdi.
Ushbu film 2026 yildagi “Oskar” mukofotining “Eng yaxshi xalqaro film” nominatsiyasida Isroil nomidan ishtirok etishi rejalashtirilmoqda. Biroq madaniyat vaziri Miki Zohar ushbu qarorni tanqid qilib, davlat mablag‘lari kino sohasiga ajratilmasligi kerakligini ta’kidladi.
Vazir fikricha, filmni mukofotlash Isroil askarlariga nisbatan haqorat sifatida talqin qilinishi mumkin. Filmda G‘arbiy Sohilda yashovchi 12 yoshli falastinlik bolaning dengizni ko‘rish orzusi tasvirlangan.
U Tel-Avivga borishga harakat qiladi, lekin nazorat-o‘tkazish punktida to‘xtatiladi. Shunga qaramay, u yashirincha Isroilga kirib, u yerda mehnat qilayotgan otasini izlashga harakat qiladi.
Filmning bosh qahramoni rolini ijro etgan 13 yoshli Muhammad G‘azzoviy “Eng yaxshi aktyor” mukofotiga sazovor bo‘lib, bu sovrinni qo‘lga kiritgan eng yosh aktyor bo‘ldi. Isroil Kino va televideniye akademiyasi raisi Asaf Amir madaniyat vazirining so‘zlariga javoban, G‘azo urushi og‘ir oqibatlarga olib kelayotgan bir paytda qarshi tomonning og‘riqlarini his qilish umid uyg‘otishini ta’kidladi.
Shu bilan birga, minglab Gollivud ijodkorlari Isroil kinotashkilotlarini boykot qilishlarini e’lon qildi. Ular Isroilni genotsid sodir etishda ayblamoqda.
Birlashgan Millatlar Tashkilotining tergov komissiyasi ham Isroilni G‘azoda genotsid uyushtirishda aybladi. Ammo Isroil Tashqi ishlar vazirligi bu da’volarni rad etib, ularni asossiz va soxta deb baholadi.
