Sherqo‘zi G‘oziyev 75 yoshida vafot etdi
O‘zbek san’atining mashhur aktyori va rejissyori Sherqo‘zi G‘oziyev 75 yoshida vafot etdi. Bu haqda Zamin.uz xabar berdi.
Bu haqda Madaniyat vazirligi ma’lum qildi. Sherqo‘zi G‘oziyev 1950-yilda Farg‘ona viloyati, Buvayda tumani, Chirkay qishlog‘ida tug‘ilgan.
U Toshkent politexnika institutining qurilish fakultetini tamomlagan, so‘ngra Toshkent madaniy o‘qituvchilar texnikumining rejissyorlik bo‘limida uch yil tahsil olgan. 1971-yilda Ostrovskiy nomli institutning aktyorlik bo‘limiga sirtdan o‘qishga kirib, 1976-yilda muvaffaqiyatli bitirdi.
1970-yildan boshlab «Teleminiatyuralar teatri»da sahnaga chiqib, turli rollarni ijro eta boshladi. 1978-yildan O‘zbekiston davlat filarmoniyasida faoliyat yuritdi.
1990-yilda O‘zbekiston va Hindiston hamkorligida suratga olingan «Changalzor qiroli» filmida zootexnik rolini o‘ynadi. Shuningdek, «Sherxon» studiyasini tashkil etib, hindlar bilan hamkorlikda 2006-yilda «Sherxon traktorchi» kinokomediyasini, 2008-yilda esa «Yolg‘iz emassan» melodramasini yaratdi.
Sherqo‘zi G‘oziyev «Kelinlar qo‘zg‘oloni», «Tangalik bolalar», «Temir xotin», «Temir erkak», «Oltin devor», «Sarvinoz 2» va «Jiblajibon» kabi ko‘plab filmlarda ham suratga tushgan. U o‘zining san’atdagi xizmatlari bilan ko‘plab tomoshabinlar qalbida chuqur iz qoldirdi.
