Qirg‘iziston poytaxti Bishkek shahrida 24 sentyabr kuni mamlakatning eng yirik va nufuzli tadbirlaridan biri bo‘lgan “Miss Qirg‘iziston” milliy go‘zallik tanlovining final bosqichi o‘tkazildi. Bu haqda Zamin.uz xabar berdi.
Ushbu tanlovda mamlakatning eng chiroyli, iste’dodli va zukko qizlari ishtirok etdi. Bu haqda 24.kg nashri ma’lum qildi.
Tanlov natijalariga ko‘ra, “Miss Qirg‘iziston – 2025” unvoni Ayana Rasul qiziga nasib etdi. Uning qo‘liga toj bilan birga 200 ming somlik sertifikat taqdim etildi.
Ayana g‘alabasini izohlarkan, ayollar doimo o‘z kuchiga ishonishi lozimligini ta’kidladi. U mehnat, sabr-toqat va Vatanga bo‘lgan muhabbat har doim muvaffaqiyat kaliti ekanini qayd etdi.
Hakamlar hay’ati asosiy g‘olibdan tashqari uch nafar ishtirokchiga Gran-pri unvonini berdi. Anora Esongaldiyeva “Miss Kyrgyzstan Universe” nomini qo‘lga kiritib, “Miss Universe” tanlovida Qirg‘iziston sharafini himoya qiladi.
Madina Ermekova “Miss Kyrgyzstan Grand International” unvoniga sazovor bo‘lib, “Miss Grand International” finalida ishtirok etadi. Syuzanna Umetova esa “Miss Kyrgyzstan International” unvoni bilan “Miss International” tanloviga yo‘llanma oldi.
Ma’lumotlarga ko‘ra, g‘oliba Ayana Rasul qizi mashhur xonanda Aygerim Rasul qizining singlisi va Qirg‘iziston xalq artisti Rasul Mamatqulovning qizi hisoblanadi. Shuningdek, eslatib o‘tamiz, yaqinda Rossiyada turmush qurgan ayollar o‘rtasida o‘tkazilgan 25-umumrossiya go‘zallik tanlovi “Missis Rossiya – 2025”da Magnitogorsk shahrida yashovchi 37 yoshli Yekaterina Semenova g‘olib deb topilgan edi.
