P.Diddi sudda 11 yil qamoq jazosiga duchor bo‘lishi mumkin

Federal prokurorlar mashhur reper Shon Kombs, ya’ni P.Diddini 11 yilga ozodlikdan mahrum etish va 500 ming dollar jarima bilan jazolashni so‘rab sudga murojaat qilishdi. Bu haqda Zamin.uz xabar berdi.

Sud hujjatlariga ko‘ra, ayblov tomoni reper uchun kamida 135 oylik qamoq jazosi berilishini talab qilmoqda. Yakuniy hukm 3 oktyabr kuni, juma kuni Nyu-York shahrida e’lon qilinishi kutilmoqda.

P.Diddining advokatlari esa unga nisbatan yengilroq jazo tayinlanishini istab, 14 oydan ortiq bo‘lmagan muddatga qamoqqa olishni so‘rashmoqda. Ular sudgacha o‘tkazilgan bir yillik qamoq muddatini umumiy jazoga qo‘shib hisoblash kerakligini ham ta’kidlamoqda.

Eslatib o‘tamiz, iyul oyining boshida hukm chiqargan hakamlar hay’ati P.Diddini ayollarni fohishalikka jalb qilishda aybdor deb topdi. Biroq u jinoyatchilik guruhiga rahbarlik qilish va jinsiy savdo bilan bog‘liq og‘irroq ayblovlardan ozod qilindi.

Sud jarayoni davom etmoqda va yakuniy qaror yaqin kunlarda e’lon qilinadi.