Kristen Bell tasdiqladi: Muz yurak 3 ishga tushdi
Gollivud aktrisasi Kristen Bell Disney studiyasining mashhur “Muz yurak” multfilmining uchinchi qismining suratga olish ishlari boshlandigini tasdiqladi. Bu haqda Zamin.uz xabar berdi.
Aktrisa ma’lum qilishicha, aktyorlar jamoasi yaqin kunlarda ishlarni boshlaydi. Anna obrazini ijro etayotgan Bell ssenariy bilan tanishib chiqqan, ammo hozircha tafsilotlarni oshkor qilmayapti.
Bellning so‘zlariga ko‘ra, loyiha hozir ijodiy bosqichda bo‘lib, asosiy e’tibor g‘oyalarni ishlab chiqishga qaratilgan. Disney har bir bosqichda mukammallikka intiladi va barcha jihatlar qayta ko‘rib chiqiladi.
Shu sababli film nihoyatda sifatli bo‘lishi kutilmoqda. Dastlabki ma’lumotlarga ko‘ra, “Muz yurak 3” filmi 2027 yilda premerasi bo‘lib o‘tadi.
Ilk vizual eskizlarda Elza oq otda, Anna esa qo‘ng‘ir kiyikda tasvirlangan, bu esa muxlislar orasida yangi sarguzashtlarga qiziqishni oshirdi. Eslatib o‘tamiz, “Muz yurak”ning birinchi qismi 2013 yilda namoyish etilib, Disney studiyasiga “Oskar” mukofotini olib kelgan.
Ikkinchi qismi esa dunyo bo‘yicha 1 milliard dollardan ortiq daromad keltirib, “Into the Unknown” kabi mashhur qo‘shiqlarni taqdim etgan. Shuningdek, avvalroq Disney studiyasi “Aristokrat mushuklar” multfilmining remeykini suratga olmaslikka qaror qilgani haqida xabar berilgan edi.
