10-Evropa kinofestivali 2023-yilning 7-9-noyabr kunlari Toshkent shahrida, 12-noyabr kuni esa Termiz shahrida o‘tkazilishi rejalashtirilgan. Bu haqda Zamin.uz xabar berdi.
Ushbu festival doirasida Yevropa Ittifoqiga a’zo davlatlardan 12 ta film bepul namoyish etiladi. Bu filmlar asl tilda bo‘lib, o‘zbek va rus tillaridagi subtitrlar bilan taqdim etiladi.
Festival Yevropa davlatlari elchixonalari hamda O‘zbekiston kinematografiya agentligi ko‘magida tashkil etilgan. Tadbir dasturidan lirik dramalar, ilhomlantiruvchi voqealar va boshqa turli janrdagi filmlar o‘rin olgan.
Shuningdek, “Avlodlar” mavzusida qisqa metrajli havaskor filmlar ham namoyish qilinadi. Bu maxsus dastur Fransuz alyansi va Gyote instituti ko‘magida amalga oshiriladi.
Festivalning madaniy qismi ispan raqs guruhi Aire Nuevo Danza chiqishlari bilan yanada boyitiladi. O‘zbekistonda Evropa kinofestivali ilk bor 2013-yilda o‘tkazilgan bo‘lib, o‘shandan buyon u madaniy almashuv va hamkorlik uchun muhim an'anaga aylangan.
Ushbu festival yurtimizda Yevropa madaniyati bilan yaqindan tanishish imkonini yaratadi.
