Mashhur reper Timati ta’til paytida yangi tug‘ilgan qizalog‘i bilan tushgan suratlarini ijtimoiy tarmoqlarda e’lon qildi. Bu haqda Zamin.uz xabar berdi.
Ushbu suratlarda u qizini quchoqlab, dengiz bo‘yida oila davrasida tinch va baxtli dam olayotgani aks etgan. Shuningdek, Timatining sevgilisi Valentina Ivanova ham ijtimoiy tarmoqlarda reper va qizalog‘i bilan tushgan suratlarini ulashdi.
Bu suratlarda ular uy fonida yoki oyna qarshisida tushgan onlarini aks ettirishgan. Ushbu lavhalar san’atkorning muxlislari tomonidan iliq qarshi olindi.
Chunki so‘nggi paytlarda Timati va Valentinaning munosabatlarida muammolar borligi haqida mish-mishlar tarqalgan edi. Ayrim kuzatuvchilar Valentina yolg‘iz dam olayotganiga e’tibor qaratgan bo‘lsa, yangi suratlar juftlikning baxtli ekanini ko‘rsatib, bu gap-so‘zlarga chek qo‘ydi.
Eslatib o‘tamiz, avgust oyining boshida Timati va Valentina qiz farzandli bo‘lganini ma’lum qilishgan edi. Bu Timatining uchinchi farzandi bo‘lib, undan avval Alisa ismli qizi va Ratmir ismli o‘g‘li bor.
Alisa uning sobiq rafiqasi Alyona Shishkovadan, Ratmir esa Anastasiya Reshetovadan tug‘ilgan.
