Tom Kruz yonayotgan parashyut bilan rekord o‘rnatdi

Tom Kruz "Uddalab bo‘lmas topshiriq: Yakuniy hisob-kitob" filmini suratga olish jarayonida bajarilgan xavfli tryuklardan biri uchun Ginnesning rekordlar kitobiga kiritildi. Bu haqda Zamin.uz xabar berdi.

Aktyor oldindan yoqib qo‘yilgan parashyut bilan 16 marta sakrashni amalga oshirgan. Bu haqda Hollywood Reporter xabar berdi.

Film sahnalaridan birida Tom Kruz ijro etgan qahramon Itan Xant shikastlangan samolyotdan zaxira parashyuti bilan sakraydi. Uning asosiy parashyuti yonib ketadi, shuning uchun qahramon arqonlarni kesadi va oxirgi lahzada zaxira parashyutni ochadi.

Ushbu murakkab tryuk aktyor tomonidan jonli ravishda bajarilgan. Kruz Janubiy Afrikadagi Drakon tog‘lari ustida, vertolyotdan 2000 metrdan ortiq balandlikda 16 marta sakragan.

Har bir sakrashda uning parashyuti yonuvchi suyuqlik bilan to‘yintirilib, yoqib yuborilgan. Ushbu xavfli va murakkab harakat Ginnesning rekordlar kitobi tomonidan "bir kishi tomonidan eng ko‘p yonayotgan parashyut bilan sakrash" nominatsiyasida rekord sifatida qayd etildi.

Ginnes rekordlar kitobi bosh muharriri Kreyg Glendey bu haqda shunday dedi: “Tom Kruz rekordlar uchun yaratilgandek. U yana bir bor o‘zini chegarasiz imkoniyatga ega aktyor sifatida ko‘rsatdi.”