Toshkent va Termizda Yevropa kinolari festivali bo‘lib o‘tadi
7-9 noyabr kunlari Toshkent shahrida, 12 noyabr kuni esa Termiz shahrida Yevropa kinolari festivali o‘tkaziladi. Bu haqda Zamin.uz xabar berdi.
Ushbu tadbir bu yil Yevropa va O‘zbekiston o‘rtasidagi madaniy aloqalarning o‘n yilligi munosabati bilan tashkil etilmoqda. Festival dasturiga Yevropaning turli davlatlariga tegishli 12 ta badiiy film kiritilgan.
Barcha filmlar asl tilda namoyish qilinadi va ular o‘zbek hamda/yoki rus tilidagi subtitrlar bilan taqdim etiladi. Festival doirasidagi barcha namoyishlar bepul bo‘lib, barcha kinosevarlar uchun ochiqdir.
Toshkent shahridagi kinonamoyishlar Milliy kino san’ati saroyida bo‘lib o‘tadi. Manzil: Navoiy ko‘chasi, 15-uy.
Termiz shahridagi kinonamoyishlar esa “Termiz” kinoteatrida tashkil etiladi. Ushbu festival Yevropa va O‘zbekiston o‘rtasidagi madaniy hamkorlikni yanada mustahkamlashga xizmat qiladi.
