Ozodbek Nazarbekovning to‘ydagi ishtiroki bahs-munozaraga sabab bo‘ldi
O‘zbekiston madaniyat vaziri Ozodbek Nazarbekovning to‘y marosimida qo‘shiq kuylayotgani aks etgan video ijtimoiy tarmoqlarda keng muhokamalarga sabab bo‘ldi. Bu haqda Zamin.uz xabar berdi.
Videoda tadbirda ishtirok etayotgan mehmonlar ijro paytida san’atkorga pul – 100 ming, 200 ming so‘mlik kupyuralar va AQSh dollarlarini taqdim etayotgani aks etgan. Mazkur holat ijtimoiy tarmoq foydalanuvchilari orasida turlicha fikrlar uyg‘otdi.
Ayrimlar buni xalq an’anasining bir qismi, san’atkorga nisbatan hurmat va minnatdorchilik ifodasi sifatida qabul qilishdi. Boshqalar esa davlat arbobi sifatida vazirning bunday xatti-harakatini noo‘rin deb baholashdi.
Ozodbek Nazarbekov 1974 yil 7 may kuni Andijon viloyatining Shahrixon tumanida tug‘ilgan. U O‘zbekiston va Qoraqalpog‘iston xalq artisti, «El-yurt hurmati» ordeni sohibi, taniqli xonanda, bastakor va jamoat arbobidir.
Nazarbekov ijodiy faoliyatini 1990-yillarda boshlagan va o‘zbek estradasining mashhur vakillaridan biriga aylangan. Nazarbekovning ijodi xalq orasida keng tanilgan bo‘lib, uning «Jondan aziz», «Qadamlar hikmati» va «Mushtarak manzil» kabi qo‘shiqlari mashhur.
U ko‘plab san’atkorlar bilan hamkorlik qilib, yirik ijodiy loyihalarda ishtirok etgan. 2018 yilda u Madaniyat vazirining birinchi o‘rinbosari lavozimiga tayinlangan.
2020 yil dekabr oyida esa O‘zbekiston Respublikasi madaniyat vaziri etib tayinlandi. Shuningdek, u Yunus Rajabiy nomidagi O‘zbek milliy musiqa san’ati institutiga rahbarlik qilib kelmoqda.
Nazarbekov avval ham ijtimoiy tarmoqlarda muhokamalarga sabab bo‘lgan. 2024 yilda u kiyim do‘koni reklamasida, 2023 yil avgust oyida esa xususiy universitetning promo-roligida ishtirok etgani e’tiborni tortgan edi.
