Moskvada sud bloger va biznes-trener Ayaz Shabutdinovga nisbatan jinoiy ish bo‘yicha hukm chiqardi. Bu haqda Zamin.uz xabar berdi.
U yetti yil davomida umumiy tartibli koloniyada jazoni o‘tashga hukm qilindi. Shuningdek, sud uni 5 million rubl miqdorida jarimaga tortdi va 113 ta firibgarlik holatida aybdor deb topdi.
Mazkur jinoyatlar natijasida yetkazilgan zarar miqdori 57 million rubldan oshgan. Ayaz Shabutdinov 2023 yil 3 noyabr kuni Moskvada hibsga olinib, tergov izolyatoriga jo‘natilgan edi.
Tergov ma’lumotlariga ko‘ra, u va uning sheriklari, jumladan, "Like Center" kompaniyasi orqali, mijozlarga muvaffaqiyatli biznes yaratish va katta daromad olishga va’da beruvchi kurslarni sotishgan. Biroq ularning faoliyati aslida firibgarlik bo‘lib chiqqan.
Sud jarayonida Shabutdinov dastlab o‘z aybini tan olmagan, ammo keyinchalik qilgan xatolarini e’tirof etdi. U sudda ishonchni tiklash uchun astoydil harakat qilishga tayyorligini bildirdi va o‘zining ta’lim dasturlariga nisbatan ortiqcha umidlar uyg‘otganligi uchun uzr so‘radi.
Tergov izolyatorida bo‘lgan vaqtida o‘z xatti-harakatlari haqida chuqur o‘ylash imkoniga ega bo‘lganini ta’kidladi. 2024 yil fevral oyida unga nisbatan firibgarlik bo‘yicha yana yettita yangi jinoiy ish qo‘zg‘atilgani ma’lum qilindi.
