“Sehrgar”ning 4-mavsumi tomoshabinlarni ranjitdi
2025-yil 30-oktabrda Netflix platformasida “Sehrgar” (“The Witcher”) serialining to‘rtinchi mavsumi taqdim etildi. Bu haqda Zamin.uz xabar berdi.
Biroq yangi qismlar tomoshabinlar va tanqidchilar tomonidan ziddiyatli baholandi. Rotten Tomatoes platformasida tanqidchilar serialni 53 foizga baholagan bo‘lsa, tomoshabinlar bahosi atigi 21 foizni tashkil etdi.
Bu serial tarixidagi eng past ko‘rsatkichlardan biri sifatida qayd etildi. Tomoshabinlarning asosiy e’tirozi aktyor Henry Cavillning Geralt roli uchun Liam Hemsworth bilan almashtirilishi emas, balki serialning kitob va o‘yinlar asosidagi asl ruhidan uzoqlashganiga qaratildi.
Ko‘plab fikr-mulohazalarda bu serial endi “Sehrgar” asaridan ilhomlangan, ammo asl hikoyaga yaqin bo‘lmagan bir moslama bo‘lib qolganligi qayd etildi. Muxlislar ssenariy zaifligini qattiq tanqid qilishdi.
Ayniqsa, Ciri obraziga oid hikoya chizig‘i “mazmunsiz” deb topilib, keraksiz personajlar qo‘shilgani va muhim qahramonlar vaqtida olib tashlangani aytildi. Serialning ohangi ham o‘zgarib, u endilikda o‘smirlar uchun mo‘ljallangan oddiy fantastik hikoyaga aylangani ta’kidlandi.
Liam Hemsworthning Geralt rolidagi ijrosi esa aralash baholarga ega bo‘ldi. Ba’zilar uning rolda “harakat qilgani” va “kutilganidan yaxshiroq moslashgani”ni tan olishgan bo‘lsa-da, ko‘pchilik uni asl Geraltga mos kelmaydi deb hisoblamoqda.
Yangi Geralt avvalgidek qattiqqo‘l va tajribali emas, balki juda “so‘zamol” bo‘lib qolgani haqida shikoyatlar bildirildi. Tomoshabinlar orasida past baholarning asosiy sababi serial ijodkorlarining Andrzej Sapkowski asarlariga hurmatsizlik qilganliklari deb ko‘rilmoqda.
Ularning asl manbaga mos bo‘lmagan o‘zgarishlari qattiq tanqid ostiga olindi. Shu sababli, ko‘pchilik to‘rtinchi mavsumni “Sehrgarning parodiyasi” yoki “serialning oxiri” deb atadi.
Ayrimlar esa Henry Cavill ketganidan keyin serialni yopish kerak edi, degan fikrni bildirishdi.
