“Alisa mo‘jizalar mamlakatida” filmi 1 milliard yig‘di
“Alisa mo‘jizalar mamlakatida” filmi Rossiyada katta muvaffaqiyat qozondi. Bu haqda Zamin.uz xabar berdi.
Film prokatga chiqqanining 17-kunida 1 milliard rubl daromad yig‘ishga muvaffaq bo‘ldi. Bu haqda YAAAT tizimining rasmiy ma’lumotlari tasdiqlaydi.
Joriy yilda Rossiyada jami sakkizta film ushbu ko‘rsatkichdan oshib ketdi. Ular orasida “Alisa mo‘jizalar mamlakatida”, “Zumrad shahar sehrgari: Sariq g‘ishtli yo‘l”, “Finist: Birinchi ritsar”, “Payg‘ambar: Aleksandr Pushkin haqidagi hikoya”, “Batya-2: Bobo”, “Kraken”, “Avgust” va “Gorinich” filmlari bor.
Har biri 1 milliard rubldan ortiq daromad keltirgan. “Alisa mo‘jizalar mamlakatida” filmining premerasi 23-oktabr kuni bo‘lib o‘tdi.
Film rejissyori Yuriy Xmelnitskiy, ssenariy muallifi esa Karina Chuvikova. Bosh rollarda taniqli aktyorlar Anna Peresild, Milos Bikovich, Paulina Andreyeva, Irina Gorbacheva va Sergey Burunov ishtirok etishgan.
Film syujeti moskvalik maktab o‘quvchisi Alisaning hikoyasi asosida qurilgan. Alisa sinfdoshlari va ota-onasi bilan janjallashib, tasodifan Mo‘jizalar mamlakatiga tushib qoladi.
Bu mamlakat aholisi unga o‘z atrofidagi odamlarning ertaklardagi versiyasi bo‘lib ko‘rinadi. Film Lyuis Kerrollning mashhur asaridan ilhomlanib suratga olingan.
