Denis Vilnev "Duna" trilogiyasini yakunladi

Rejissyor Denis Vilnev "Duna" trilogiyasining uchinchi qismini suratga olish ishlarini yakunladi. Bu haqda Zamin.uz xabar berdi.

Filmning mazmuni Frenk Gerbertning "Duna payg‘ambari" va "Dunaning bolalari" asarlariga asoslangan. Ma’lum qilinishicha, asosiy rollarni Timoti Shalame, Zendeya, Jeyson Momoa, Florens Pyu kabi mashhur aktyorlar ijro etgan.

Uchinchi filmda texnik jihatdan o‘zgarishlar amalga oshirilgan. Avvalgi ikki film raqamli formatda suratga olingan bo‘lsa, bu safar tasvir lentaga yozilgan.

Ushbu qarorni "La-La Lend" filmi operatori Linus Sandgren taklif qilgan. U Greg Freyzerning o‘rnini egallab, trilogiyaning yakuniy qismiga yanada tabiiy estetikani olib kirishga harakat qilgan.

Denis Vilnev "Duna" filmlarini davom ettirishni rejalashtirmayotganini ma’lum qildi. U endi Jeyms Bond haqidagi yangi loyiha ustida ishlashga e’tibor qaratmoqchi.

"Duna" trilogiyasining so‘nggi qismi jahon premyerasi kelasi yil dekabr oyida o‘tkazilishi rejalashtirilgan. Shu kuni "Qasoskorlar: Qiyomat kuni" filmi ham namoyish etilishi kutilmoqda.

"Duna" Frenk Gerbert tomonidan yaratilgan mashhur ilmiy-fantastik asar bo‘lib, unda voqealar uzoq kelajakda sodir bo‘ladi. Hikoya cho‘l sayyorasi Arrakiz atrofida rivojlanadi.

Ushbu sayyora yagona "spice" manbai bo‘lib, qudratli sulolalar uning ustidan nazorat o‘rnatish uchun o‘zaro kurash olib boradilar.