“Setora” guruhi yangi qo‘shiq va konsert bilan qaytdi
Mashhur “Setora” guruhi yana san’atga qaytdi va yangi ijodi bilan muxlislarini xursand qildi. Bu haqda Zamin.uz xabar berdi.
Guruhning “U biladi” nomli yangi qo‘shig‘i 11-noyabr kuni radio to‘lqinlarida hamda YouTube platformasida taqdim etildi. Mazkur qo‘shiqni guruh a’zolari Feruza Latipova va Laylo Galiyeva ijro etgan.
Qo‘shiqning so‘z va musiqasi bastakor Shaxnoz tomonidan yozilgan. Yangi ijod namunasi “Setora” uslubiga xos bo‘lib, unda lirika va zamonaviy ohang uyg‘unlashgan.
Bu esa tinglovchilarga iliq va yoqimli tuyg‘ularni taqdim etadi. Shuningdek, ma’lum bo‘lishicha, guruhning 18–21 dekabr kunlari konsert dasturi o‘tkazilishi rejalashtirilgan.
Biroq bu safar sahnada Komila Xo‘jayeva ishtirok etmaydi. Yangi qo‘shiq muxlislar orasida katta qiziqish uyg‘otdi.
Ko‘pchilik “Setora”ning eski kayfiyatini his etganini, ammo yangi ijroda zamonaviy ohang va uslubni sezganini ta’kidlashmoqda. Bu esa guruhning ijodiy izlanishlari davom etayotganidan dalolat beradi.
