Djennifer Eniston yangi sevgilisi haqida ochiq gapirdi
Djennifer Eniston Amerikaning mashhur *Elle* jurnali muqovasida paydo bo‘ldi. Bu haqda Zamin.uz xabar berdi.
Suratda aktrisa klassik ko‘ylak va jinsi kiyimda tasvirlangan bo‘lib, ko‘zlaridagi ilhom va hissiyot ko‘pchilikning e’tiborini tortdi. Ushbu his-tuyg‘ularning sababi uning yangi sevgilisi bilan bog‘liq ekanligi ma’lum bo‘ldi.
*Elle* jurnaliga bergan intervyusida Eniston ilk bor sevgilisi haqida ochiqchasiga so‘z yuritdi. Ma’lum bo‘lishicha, aktrisaning sevgilisi gipnoterapevt bo‘lib, u 56 yoshli Djenniferning hayotida muhim o‘rin egallagan.
Enistonning so‘zlariga ko‘ra, sevgilisi nafaqat g‘ayrioddiy qobiliyatga ega, balki juda ko‘p odamlarga yordam berishni o‘z hayotining maqsadi deb biladi. U sevgilisini o‘ta mehribon, bag‘rikeng va boshqalar uchun ichki tinchlikni topishga yordam beruvchi inson sifatida ta’rifladi.
Shuningdek, juftlik o‘rtasidagi munosabatlar haqida yozda mish-mishlar tarqalgan edi. Ularni birgalikda Mayorkadagi ta’tilda ko‘rishgan.
Noyabr oyida esa Djennifer bu munosabatlarni tasdiqladi. U ijtimoiy tarmoqda sevgilisini quchoqlab tushgan qora-oq suratni joylab, «Tug‘ilgan kuning bilan, sevgilim.
O‘paman», — deb yozdi. Insayderlarning ma’lumotlariga ko‘ra, juftlik bir-birini to‘liq tushunadi.
Ular meditatsiya, yoga, terapiya va o‘z itlariga bo‘lgan muhabbatni birga bo‘lishadi. Oldin Bred Pitt va Jastin Ter bilan turmush qurgan Djennifer uchun ushbu munosabatlar haqiqiy baxt va ruhiy tinchlik manbai ekanligi aytilmoqda.
