Aktrisa Malika Rahimova yaqinda “Mirsodiqova bilan” YouTube loyihasiga bergan intervyusida talabalik davri, kasbiy faoliyati va oilaviy hayoti haqida ochiq gapirdi. Bu haqda Zamin.uz xabar berdi.
Rahimova talabalik yillarida kontrakt to‘lovini amalga oshirish uchun turli ishlarni bajarishga majbur bo‘lganini ta’kidladi. Dastlab u bolalar maydonchasida tarbiyachi bo‘lib ishlagan.
Keyinchalik supermarket ma’muriyati uni videokuzatuv bo‘limiga taklif qilgan va qisqa muddatda qorovul sifatida ish boshlagan. U bu vazifaga bir oz qo‘rquv bilan yondashgan bo‘lsa-da, vaqt o‘tishi bilan ishga ko‘nikib, hatto o‘g‘irlik holatlarini aniqlashni ham o‘rgangan.
Keyinroq temiryo‘l vokzalida ishlash taklifini olgan. Bu vaqtda u o‘qishni tamomlagan bo‘lib, teatrda ish izlagan, lekin bo‘sh shtat yo‘qligi sababli yana vokzalga qaytishga majbur bo‘lgan.
Shu bilan birga, u teatrda yarim shtat asosida rejissyor yordamchisi sifatida ishlashni boshlagan. Bugungi kunda Malika Rahimova teatrning birinchi toifali aktrisasi hisoblanadi.
Temiryo‘l vokzalida esa yo‘lovchilar xavfsizligini ta’minlash uchun portlovchi moddalarni aniqlovchi maxsus uskunalar bilan ishlagan. Hozirda aktrisa tug‘ruq ta’tilida bo‘lib, farzandlari tarbiyasiga alohida e’tibor qaratmoqda.
