Kristofer Nolan “The Odyssey” filmini suratga oldi
Mashhur britaniyalik rejissyor Kristofer Nolan o‘zining eng yirik loyihalaridan biri bo‘lgan “The Odyssey” filmini suratga olish ishlarini yakunlaganini e’lon qildi. Bu haqda Zamin.uz xabar berdi.
U Empire nashriga bergan intervyusida film uchun ikki million futdan (609,6 kilometr) ortiq kino tasma ishlatilganini ma’lum qildi. Suratga olish ishlari 91 kun davom etgan bo‘lib, sahnalarning asosiy qismi haqiqiy ochiq dengizda olingan.
“The Odyssey” filmi Gomerning mashhur “Odisseya” dostoni asosida yangi talqinda yaratilgan. Filmda bosh qahramon Odissey rolini Met Deymon ijro etadi.
Shuningdek, Tom Holland, Ann Hetuey, Zendaya va Robert Pattinson kabi taniqli aktyorlar ham ushbu loyihada ishtirok etgan. Nolanning so‘zlariga ko‘ra, ushbu film uning bolalikdagi sevimli afsonaviy sarguzasht filmlariga ehtirom sifatida yaratilgan.
U shunday deydi: “Bolaligimda ko‘rgan Harryhausen uslubidagi sarguzasht filmlarini bugungi IMAX texnologiyasi va katta byudjet bilan qayta yaratish hech kimning xayoliga kelmagan edi. Men aynan shu bo‘shliqni to‘ldirishni xohlardim.” Filmning premyerasi 2026-yil 17-iyul kuni IMAX formatida bo‘lib o‘tadi.
Tanqidchilar esa allaqachon “The Odyssey”ni Kristofer Nolanning navbatdagi monumental asari sifatida baholashmoqda.
