Vazira Yunusova: “Yoshlik o‘tadi, oxirida yolg‘iz qolasiz”

Aktrisa Vazira Yunusova turmush o‘rtog‘ining vafotidan keyingi hayotiy sinovlari haqida ochiq gapirdi. Bu haqda Zamin.uz xabar berdi.

U “Ayol qalbi” dasturiga bergan intervyusida 30 yillik turmushi, mehrga to‘la xotiralari va bugungi yolg‘izligi haqida so‘z yuritdi. Aktrisa umr yo‘ldoshi bilan o‘tkazgan yillarini eslar ekan, ularning bir-biriga bo‘lgan mehr-muhabbati va oddiy odatlarini tilga oldi.

Uning so‘zlariga ko‘ra, ular kuniga bir necha marta qo‘ng‘iroqlashib, bir-birining holidan xabar olishgan. “U meni eng ko‘p erkalatgan inson edi”, — deydi Yunusova ko‘z yoshi bilan.

Vazira Yunusova yoshlik yillarida turmush o‘rtog‘ining ruxsati bo‘lmagani tufayli olti yil davomida uyda o‘tirgan. Keyinchalik esa qaynonasining yordamida sahnaga qaytib, o‘z mehnati bilan aktrisalik sohasida o‘rnini topgan.

Ammo uning hayotidagi eng og‘ir sinov umr yo‘ldoshidan ayrilish bo‘lgan. “Yoshlik o‘tadi, oxirida baribir yolg‘iz qolarkansiz.

Bu tuyg‘uni ta’tilda, kech mulohazalarda yanada kuchli his qilasiz”, — deydi u. Aktrisa o‘zining oddiy farroshlikdan taniqli aktrisalik darajasiga yetgan yo‘lini ham esladi.

U mehnatning inson hayotidagi o‘rnini alohida ta’kidladi: “Ustimdan kulganlar bugun farzandlariga meni ibrat qilib ko‘rsatyapti”, — deydi u faxr bilan. Vaynlarda ishtirok etish borasidagi tanqidlarga esa befarq munosabatda: “Men aktrisaman.

Agar rol bo‘lsa, o‘ynayman. Qizlarim ham meni qo‘llab-quvvatlaydi”, — deydi Yunusova.

Bugungi kunda aktrisa turmush o‘rtog‘ining xotirasini asrab-avaylab, yolg‘izlikni yengishga intilmoqda.