“Tunnel” seriali: halollik va kurash hikoyasi
1-dekabr kuni KION onlayn-platformasida “Tunnel” nomli sakkiz qismdan iborat psixologik triller serialining premyerasi bo‘lib o‘tdi. Bu haqda Zamin.uz xabar berdi.
Serial rejissori Flyuza Farxshatova bo‘lib, bu loyiha qish mavsumining eng kutilgan asarlaridan biri sifatida baholandi. Serial voqealari insonning ichki kurashi, shaxsiy tanlovlari va sinovlari atrofida kechadi.
Undagi bosh rollarni taniqli aktyorlar Elizaveta Boyarskaya va Sergey Gilev ijro etgan. Asosiy qahramon Svetlana Suvorova ismli halol bojxona xodimi bo‘lib, u tamagirlik va korrupsiyadan yiroq, o‘z tamoyillariga qat’iy amal qilib yashaydi.
Svetlana uzoq yillar davomida Snejnin shahrida, qonun-qoidalarga sodiq holda faoliyat yuritadi. Biroq, uning hayoti kutilmaganda o‘zgaradi.
Finlyandiyalik jinoyatchilar Svetlananing turmush o‘rtog‘ini o‘g‘irlab ketishadi. Uni qaytarish uchun Svetlana o‘z tamoyillarini buzishga va qonunni chetlab o‘tishga majbur bo‘ladi.
Shu tariqa, u hayot-mamot kurashi ichiga kirib boradi. Serialning ssenariysi Nastyа Kuznetsova tomonidan yozilgan.
U ilgari “Chik” seriali muallifi sifatida tanilgan. Bu asar nafaqat ayol kuchi va ichki o‘zgarish haqida, balki insonning o‘zini anglash va haqiqiy erkinlikka erishish yo‘lidagi kurashini aks ettiradi.
Serial qahramoni Svetlana o‘z hayotini qayta ko‘rib chiqishga, ichki kuch topishga va haqiqiy ozodlikni his qilishga muvaffaq bo‘ladi. Serialning prodyuserlari Teymur Jafarov va Maksim Filatovdir.
Birinchi to‘rtta qism 1-dekabr kuni birdaniga namoyish etilgan, qolgan qismlar esa har hafta chorshanba kunlari taqdim etilishi rejalashtirilgan.
