Noyabr oyida koreys seriallari olamida tomoshabinlar uchun qiziqarli va ta’sirli loyihalar taqdim etildi. Bu haqda Zamin.uz xabar berdi.
Ushbu oyda efir yuzini ko‘rgan eng yaxshi beshta doramani saralab, ularning qisqacha mazmunini e’tiboringizga havola qilamiz. **“Qadrli X”** Reyting: 8.5 Shou-biznes olamida yulduz sifatida tanilgan Pek A-jin bolalikdagi og‘ir voqealar ta’sirida ichki dramalarga boy qahramonga aylanadi.
U faqat o‘ziga foyda keltiradigan insonlar bilan muloqotda bo‘ladi. Biroq uning yashirin tomonlarini faqat o‘gay ukasi biladi va uni qutqarish uchun barcha chegaralarni buzishga tayyor bo‘ladi.
Bu serial psixologik to‘qnashuvlarga boy va chuqur syujetli triller sifatida tomoshabinlarni o‘ziga jalb qiladi. **“Karaxt shahar”** Reyting: 8.2 Oddiy kurer Pak Te-jun nohaq qotillikda ayblanib, hayoti ostin-ustun bo‘ladi.
Qamoqdagi og‘ir kunlar, ruhoniyning yordami va o‘tmishi bilan bog‘liq voqealar uni haqiqatni izlashga va o‘zini halok qilganlardan o‘ch olishga undaydi. Bu serial hayot uchun kurash va adolatni izlash haqida hikoya qiladi.
**“Qalbga yaqin”** Reyting: 8.2 Son U-yon o‘zini hech kim sezmaydigan inson deb hisoblasa-da, tasodifiy uchrashuv uning hayotini o‘zgartiradi. U rassomlar guruhi yordamida ijod orqali o‘zini qayta kashf qiladi va bu jarayonda muhabbatni ham topadi.
Serial yorqin, iliq va ilhomlantiruvchi romantik komediya sifatida tanilgan. **“Menga uylan”** Reyting: 7.6 Yu Me-ri to‘y oldidan qallig‘ining xiyonatini bilib qoladi.
Shu paytda u lotereyada uy yutib oladi, ammo mukofotni olish uchun oilali bo‘lishi kerak. U tasodifan Kim U-ju ismli yigit bilan soxta nikoh qurishga majbur bo‘ladi.
Bu serial yengil syujet va hazil-mutoyibaga boy klassik romantik komediya hisoblanadi. **“Tayfun” kompaniyasi rahbari** Reyting: 8.1 1997 yilda iqtisodiy inqiroz davrida Kan Te-pun otasining vafotidan so‘ng “Tayfun” kompaniyasi boshqaruvini o‘z zimmasiga oladi.
Og‘ir qarorlar, xodimlar taqdiri va murakkab vaziyatlar uni haqiqiy rahbarga aylantiradi. Bu serial tarixiy voqealar asosida yaratilgan va tomoshabinlarga ilhom bag‘ishlaydi.
Ushbu doramalar noyabr oyining eng yaxshi asarlari sifatida muxlislar qalbidan chuqur joy oldi.
