Krishtianu Ronaldu “Forsaj 11” filmida rol o‘ynaydi
Amerikalik taniqli aktyor va prodyuser Vin Dizel portugaliyalik mashhur futbolchi Krishtianu Ronalduga “Forsaj” kinofranshizasida maxsus rol yozilganini ma’lum qildi. Bu haqda Zamin.uz xabar berdi.
Bu haqda u o‘zining Instagram sahifasida xabar berdi. Dizelning so‘zlariga ko‘ra, franshizaning 11-qismi 2027 yil aprel oyida premera qilinadi va bu qism seriyaning yakuni bo‘lishi kutilmoqda.
Vin Dizel o‘z sahifasida Krishtianu Ronaldu bilan birga tushgan suratni e’lon qilib, “Hamma Ronaldu filmda rol o‘ynashini so‘ragan edi. Biz unga maxsus rol yozib berdik”, deya qo‘shimcha qildi.
Bu yangilik futbol yulduzi muxlislari orasida katta qiziqish uyg‘otdi. Krishtianu Ronaldu o‘z faoliyati davomida besh marta “Oltin to‘p” sohibi bo‘lgan, besh marta Chempionlar Ligasi g‘olibligini qo‘lga kiritgan va Yevropa chempionligini nishonlagan.
Shuningdek, u jahon futbolida rasmiy o‘yinlarda eng ko‘p gol urgan futbolchi sifatida tan olingan. Hozirda Ronaldu Saudiya Arabistonining “Al-Nasr” klubida faoliyat yuritmoqda.
Bundan tashqari, Ronaldu aralash yakkakurashlar bo‘yicha WOW FC kompaniyasining hammualliflaridan biri sifatida ham faoliyat olib bormoqda. Endilikda esa u kino olamida ham o‘z iste’dodini namoyish etishi mumkin.
Bu futbol yulduzining turli sohalardagi muvaffaqiyatlari qatoriga yana bir yangi sahifa qo‘shilishi ehtimolini bildiradi.
