Jeyms Kemeron boyligi 1 milliard dollardan oshdi
Kanadalik taniqli rejissyor va prodyuser Jeyms Kemeronning boyligi 1 milliard AQSH dollaridan oshgani haqida Forbes nashri xabar berdi. Bu haqda Zamin.uz xabar berdi.
Ushbu moliyaviy yutuqqa u tomonidan suratga olingan "Titanik" va "Avatar" kabi kassabop filmlar sabab bo‘lgan. Jeyms Kemeron rejissyor sifatida 1980-yillardan buyon faoliyat yuritmoqda.
Uning ishtirokida suratga olingan filmlar umumiy hisobda 9 milliard dollar daromad keltirgan. Ushbu daromaddan Kemeron olgan ulush uning shaxsiy boyligining asosiy qismini tashkil etadi.
Uning eng muvaffaqiyatli loyihalari qatoriga "Avatar", "Titanik", "Terminator" va "Begonalar" filmlari kiradi. Qizig‘i shundaki, Kemeron o‘zini milliarder deb hisoblamaydi.
Jurnalist Mettyu Belloniga bergan intervyusida u: “Milliarder bo‘lishni xohlagan bo‘lardim, lekin bunday boylikka erishish uchun ma’lum shartnomalar qilish kerak, men esa bunday bitimlarni imzolamaganman”, – deya ta’kidlagan. Yaqinda chiqishi kutilayotgan “Avatar: Alanga va kul” filmi ham Kemeronning boyligini yanada oshirishi mumkin.
Forbes hisob-kitoblariga ko‘ra, ushbu film unga soliqlar va yig‘imlardan avval kamida 200 million dollar daromad keltirishi prognoz qilinmoqda. Jeyms Kemeronning kino sohasiga kirish yo‘li oddiy bo‘lmagan.
U dastlab yuk mashinasi haydovchisi bo‘lib ishlagan, keyinchalik esa New World Pictures kompaniyasida yordamchi bo‘lib, haftasiga 175 dollar maosh olgan. Uning rejissyor sifatidagi birinchi ishi “Piranya 2” (1981) filmi bo‘lsa-da, bu loyiha muvaffaqiyatsizlikka uchragan.
Ammo Kemeronning haqiqiy muvaffaqiyati 1984-yilda suratga olingan “Terminator” filmi bilan boshlandi. Atigi 6,4 million dollarlik byudjet bilan suratga olingan ushbu film 78 million dollar daromad keltirgan va franshiza umumiy hisobda 2 milliard dollar ishlab topgan.
Kino olamida Kemerondan tashqari, Jorj Lukas, Stiven Spilberg va Piter Jekson kabi boshqa milliarder rejissyorlar ham mavjud. Ushbu shaxslar o‘z filmlari orqali nafaqat katta daromad, balki butun dunyo miqyosida shuhrat qozongan.
