“Ummon” guruhi 10 yillik tanaffusdan so‘ng qaytdi
2010-yillarda millionlab yuraklarga yo‘l topgan “Ummon” guruhi 10 yillik tanaffusdan so‘ng yana ijodiy faoliyatini davom ettirishga qaror qildi. Bu haqda Zamin.uz xabar berdi.
Ushbu xabar Iticket.uz’ning ijtimoiy tarmoqdagi sahifasida e’lon qilindi. Guruh a’zolari o‘z murojaatlarida muxlislariga minnatdorlik izhor etib, quyidagi so‘zlarni bildirishdi: “Biz siz, muxlislarimiz uchun qaytdik va ijod qilishni boshladik.
10 yillik tanaffusga qaramay, hali ham bizni unutmaganingiz uchun barchangizga chuqur minnatdorlik bildiramiz. Kechagi uchrashuvda birga qo‘shiqlar kuyladik, o‘tmish xotiralarini esladik.
Bu his-tuyg‘ularni so‘z bilan ifodalash qiyin. Tez orada Toshkentda siz bilan uchrashamiz.” Mazkur yangilik muxlislar orasida katta qiziqish va quvonch uyg‘otdi.
“Ummon” guruhi nafaqat musiqiy jamoa, balki butun bir avlodning xotiralari, yoshlik va bolalik davriga bog‘liq iliq hissiyotlar ramzi hisoblanadi. Guruhning Toshkentdagi ilk katta konserti Humo Arenada tashkil etilishi rejalashtirilgan.
Hozircha aniq sana e’lon qilinmagan bo‘lsa-da, konsert haqidagi e’longa “Sog‘inganim mani” qo‘shig‘ining ulanishi muxlislar uchun ramziy ahamiyat kasb etdi. Bu qaytish ko‘plab yuraklar uchun kutilgan va quvonchli yangilik bo‘ldi.
