Jamshid Bobojonov: “Yangi yil — diydor bayrami”
Taniqli san’atkor Jamshid Bobojonov jurnalistlarning savollariga samimiy va hazilomuz tarzda javob berdi. Bu haqda Zamin.uz xabar berdi.
Undan bolalik yillarida Qorboboga xat yozib, qanday sovg‘a so‘ragani haqida so‘ralganida, u kulib shunday dedi: — Bir tog‘ora oliviye salat so‘raganman. Eng qizig‘i, o‘sha tilagim amalga oshgan — bir tog‘ora oliviyeni olganman.
Shu sababli hozirgacha har Yangi yilda xonadonimizda albatta bir tog‘ora oliviye bo‘ladi. Bu javobdan san’atkorning oliviye salatni juda yaxshi ko‘rishini anglash qiyin emas.
Suhbat davomida jurnalist undan: “Yangi yil deganda ko‘z oldingizga birinchi bo‘lib nima keladi?” — deya so‘radi. Jamshid Bobojonov bu savolga yanada ma’noli javob qaytardi: — Birinchi bo‘lib diydor keladi.
Yangi yil — yaqinlar, do‘stlar va jigarlar bilan diydorlashish bayrami. Shuning uchun barchaga bitta tilak: kim bilan uzoq vaqt ko‘rishmagan bo‘lsangiz, 2026 yilda albatta uchrashib qo‘ying.
Men bir narsani angladim — bu dunyoda yaqinlar va diydor g‘animat ekan. San’atkorning ushbu so‘zlari Yangi yil bayramining eng muhim qadriyatlarini — samimiy uchrashuv va mehr-oqibatni yana bir bor eslatadi.
Yangi yil nafaqat yangi orzular va maqsadlar, balki yaqinlar bilan diydorlashish uchun ham ajoyib imkoniyatdir.
