Leonardo Di Kaprio “Titanik”ni hech qachon ko‘rmaganini aytdi

Amerikalik taniqli aktyor Leonardo Di Kaprio yaqinda Jennifer Lourens olib boradigan “Actors on Actors” shousida ishtirok etdi va kutilmagan e’tirof bilan barchani hayratga soldi. Bu haqda Zamin.uz xabar berdi.

U o‘zining mashhur filmlari, jumladan, dunyoga tanilgan “Titanik” kartinasini ham hech qachon tomosha qilmaganini ma’lum qildi. Suhbat davomida Lourens Di Kapriodan kelajakda qaysi rejissyorlar bilan ishlashni xohlashini so‘radi.

Aktyor yaqinda Pol Tomas Anderson bilan birgalikda ishlaganini va bu hamkorlik uzoq muddat davom etishiga umid qilayotganini bildirdi. Shuningdek, Di Kaprio vaqtida Andersonning “Boogie Nights” filmida rol o‘ynashdan voz kechganini esladi.

Sababi, ushbu filmning suratga olish ishlari “Titanik” bilan bir vaqtda bo‘lib o‘tgan edi. Leonardo Di Kaprio hozir aniq bir rejissyorni “orzu rejissyor” sifatida ajratib ko‘rsatmasligini aytdi.

Biroq u Damien Shazell va Maykl Mann kabi rejissyorlarni yuqori baholadi. “Damien juda iste’dodli, Maykl Mann esa doimo yuqori saviyada ishlaydi”, — dedi u.

Suhbatning eng diqqatga sazovor qismi “Titanik” filmiga oid savollar bilan davom etdi. Lourens aktyordan 1997-yilda suratga olingan ushbu filmni hech bo‘lmasa keyinchalik ko‘rgan-ko‘rmaganini so‘radi.

Leonardo Di Kaprio qisqa javob berdi: “Yo‘q. Men uni umuman ko‘rmaganman.” Shuningdek, u o‘zi ishtirok etgan filmlarni odatda tomosha qilmaslik odati borligini qo‘shimcha qildi.

Jennifer Lourens ham ba’zan o‘z filmlarini ko‘rmasligini tan oldi, ammo “Titanik” kabi afsonaviy kartinani baribir ko‘rgan bo‘lardim, deya hazilomuz fikr bildirdi.