Munisa Rizayevaning bolalik orzusi sahnada ushaldi
“Setora” guruhining so‘nggi konsertida kutilmagan va ta’sirli voqea yuz berdi. Bu haqda Zamin.uz xabar berdi.
Mashhur xonanda Munisa Rizayeva sahnada “Setora” guruhi bilan birga duet ijro etdi. Bu lahza tomoshabinlar uchun ham, Munisa uchun ham unutilmas bo‘ldi.
Munisa Rizayevaning so‘zlariga ko‘ra, bu taklif unga prodyuser Davron Kabulov tomonidan berilgan. “Davron aka menga: ‘Munisaxon, “Setora” guruhi bilan duet aytsangiz bo‘ladimi?’ deb murojaat qildi.
Men esa darhol rozilik berdim. Axir bu mening bolalikdagi eng katta orzularimdan biri edi”, — deydi xonanda.
Munisa bolaligidan “Setora” guruhining ashaddiy muxlisi bo‘lganini aytdi. U yoshligida xonasining devorlari guruh a’zolarining suratlari va plakatlari bilan bezatilganini esladi.
Xonanda ayniqsa guruh a’zosi Kamila bilan o‘zini o‘xshatib kelganini qo‘shimcha qildi. “Kamilani juda yaxshi ko‘rardim, chehralarimiz o‘xshash edi.
Bugun esa bolalikdagi orzum sahnada amalga oshdi”, — dedi u. Munisa Rizayeva suhbat davomida inson orzu qilishi va ularga ishonishi kerakligini ta’kidladi.
“Orzular amalga oshadi, faqat ularga chin dildan ishonish kerak. Bejizga ‘yaxshi niyat — yarim davlat’ deyishmaydi.
Men ‘Setora’ guruhini bolaligimdan yaxshi ko‘rganman, mana, orzum ushaldi”, — deya o‘z fikrlarini yakunladi xonanda.
