Anatoliy Lobotskiy 67 yoshida vafot etdi
Mashhur sovet va Rossiya teatr hamda kino aktyori, Rossiya Federatsiyasining xalq artisti Anatoliy Lobotskiy 67 yoshida vafot etdi. Bu haqda Zamin.uz xabar berdi.
Bu haqda aktyorning yaqinlari TASS axborot agentligiga ma’lum qildi. Anatoliy Lobotskiy 1959 yil 14 yanvarda tug‘ilgan.
U Moskva shahridagi Vladimir Mayakovskiy nomidagi akademik teatrda faoliyat olib borib, ko‘plab muhim rollarni ijro etgan. 2013 yilda unga Rossiya Federatsiyasining xalq artisti unvoni berilgan.
Lobotskiy kino va televideniyedagi ishlari orqali keng ommaga tanilgan. Aktyorning eng mashhur filmlari va seriallari qatoriga “Xudolarning hasadi”, “Kalashnikov”, “Yoshlar jamoasi”, “Eski gvardiya”, “Anna Medium”, “Doktor Selivanovning shaxsiy hayoti”, “Sham yorug‘ida fol ochish” va “Obyektivdagi o‘lim” kiradi.
Ijodiy faoliyati davomida Anatoliy Lobotskiy 100 dan ortiq film va seriallarda, asosan, drama, melodrama va detektiv janrlarida rollar ijro etgan. Uning ijodi teatr va kino sohasida katta e’tiborga sazovor bo‘lib, san’atsevarlar orasida hurmat bilan tilga olinadi.
