Portugaliya terma jamoasi sardori Krishtianu Ronaldu va uning turmush o‘rtog‘i Jorjina Rodriges Qizil dengiz sohilida joylashgan The Red Sea Residences majmuasidan ikkita hashamatli villa xarid qildi. Bu haqda Zamin.uz xabar berdi.
Bu haqda Ispaniyaning Marca nashri xabar berdi. Ma’lum qilinishicha, ushbu hududga faqat charter qayig‘i yoki gidrosamolyot orqali yetib borish mumkin.
Bu esa mehmonlarga yuqori darajadagi maxfiylik, sokin muhit va begona nigohlardan xoli dam olish imkonini taqdim etadi. Ronaldu ushbu sotib olish haqida fikr bildirar ekan, Qizil dengizning betakror tabiati u va Jorjinani ilk tashrifdayoq o‘ziga maftun qilganini ta’kidladi.
Uning so‘zlariga ko‘ra, bu joyda uyga egalik qilish oilasi bilan xotirjam va yolg‘iz muhitda vaqt o‘tkazish imkonini beradi. Mazkur qaror Ronaldu oilasining xususiylik va osoyishta hayotga bo‘lgan ehtiyojidan kelib chiqqan.
Shu bilan birga, bu qadam dunyodagi eng eksklyuziv hududlardan biriga muhim sarmoya kiritish sifatida baholanmoqda. Juftlik 2023 yildan beri ushbu maskanda dam olib kelmoqda va endilikda bu yerda uch xonali va ikki xonali ikkita villaga rasman egalik qiladi.
The Red Sea Residences bosh direktori Jon Pagano Ronaldu va Rodrigesning bu hududni tanlaganidan mamnunligini bildirib, bu qaror hududning hashamat, maxfiylik va tabiat bilan uyg‘unligiga berilgan yuksak baho ekanini ta’kidladi.
