Nolan suratga olgan "Odisseya" treyleri rekord o‘rnatdi
2025-yil 25-dekabr kuni taniqli rejissyor Kristofer Nolan tomonidan suratga olingan "Odisseya" filmi treyleri bir sutka ichida 121 million marta tomosha qilinib, rekord natijaga erishdi. Bu haqda Zamin.uz xabar berdi.
Bu haqda Forbes nashri WaveMetrix kompaniyasiga tayanib xabar berdi. Mazkur ko‘rsatkich Nolan tomonidan suratga olingan avvalgi "Oppenheymer" filmi treyleridan ikki baravar yuqori.
"Oppenheymer" treyleri ilk 24 soatda taxminan 50 million marta ko‘rilgan edi. "Odisseya" Universal studiyasi uchun yilning eng muvaffaqiyatli treyleri sifatida e’tirof etildi.
Ko‘rishlar bo‘yicha eng katta ulush TikTok platformasiga to‘g‘ri kelgan — 27%. Treyler shuningdek, YouTube, Facebook, Instagram va X platformalarida ham katta qiziqish bilan tomosha qilingan.
Filmning asosiy mavzusi Gomerning mashhur "Odisseya" dostoni bo‘lib, unda Troya urushidan keyingi Odisseyning sarguzashtlari va safarlari hikoya qilinadi. Asosiy rolda Mett Deymon ishtirok etgan bo‘lsa, boshqa rollarda Enn Xeteuey, Tom Holland, Zendeya, Robert Pattinson, Lupita Niongo va Sharliz Teron kabi mashhur aktyorlar qatnashgan.
Film byudjeti taxminan 250 million dollarni tashkil etgan. "Odissseya" filmining premyerasi 2026-yil 17-iyulga belgilangan.
Shunga qaramay, chiptalar sotilishi relizdan bir yil oldin boshlangan. Film tomoshabinlar va kino ixlosmandlari orasida katta qiziqish uyg‘otmoqda.
