Ulug‘bek Qodirov “Setora” bilan sahnada orzusini ro‘yobga chiqardi
Aktyor va xonanda Ulug‘bek Qodirov bolalikdagi eng katta orzularidan biri amalga oshganini samimiyat bilan so‘zlab berdi. Bu haqda Zamin.uz xabar berdi.
Unga ko‘ra, afsonaviy “Setora” guruhi bilan bir sahnada qo‘shiq kuylash uzoq yillar davomida uning orzusi bo‘lgan. Ushbu voqea esa Ulug‘bek uchun haqiqiy Yangi yil sovg‘asiga aylandi.
Ulug‘bek Qodirovning aytishicha, yoshligida “Setora” guruhining konsertlariga kirish juda qiyin bo‘lgan. O‘sha paytlarda konsert chiptalarini topishning imkoni bo‘lmagani sababli, u do‘stlari bilan birga darvozadan oshib tushib, konsertga kirishga harakat qilgan.
Bu kunlarni u hozir kulgu bilan yodga oladi. O‘sha vaqtda sahnaga chiqish faqat bir orzu edi, xolos.
“Faqat niyat qilib yurganman. Yaratganimga shukr, Olloh ortig‘i bilan nasib qildi”, — deydi xonanda.
Kecha bo‘lib o‘tgan konsertda Ulug‘bek Qodirov ushbu orzusini amalga oshirdi. U afsonaviy “Setora” guruhi bilan birgalikda qo‘shiq kuylab, tomoshabinlarga kutilmagan va iliq lahzalarni tuhfa etdi.
Bu voqea nafaqat xonanda uchun, balki tinglovchilar uchun ham unutilmas lahzaga aylangan.
