Muqaddas Xoliqova: "Hazil oilaviy murosa kalitidir"
Ko‘plab kino va spektakllardagi rollari bilan tomoshabinlar mehrini qozongan aktrisa Muqaddas Xoliqova oilaviy hayot, sabr va murosa haqida samimiy fikrlari bilan o‘rtoqlashdi. Bu haqda Zamin.uz xabar berdi.
U turmush va ijodni birgalikda olib borish oson bo‘lmaganini, ammo murakkab vaziyatlardan chiqishda eng yaxshi vosita hazil ekanini ta’kidladi. Aktrisaning so‘zlariga ko‘ra, o‘sha yillarda teatrdagi ish jadvali juda tig‘iz bo‘lgan.
Spektakllar kech boshlanib, kech tugardi. Uyda esa uch nafar kichik farzand kutardi: biri uch yoshda, biri ikki yoshda, yana biri bir yoshda.
Uyga qaytganida esa har kuni bir xil holat takrorlanardi. — Uyga kelib, eshikni taqillatardim, — deydi aktrisa.
— Ichkaridan “Kim?” degan ovoz eshitilardi. “Men”, derdim.
Turmush o‘rtog‘im bolalarni ko‘tarib turardi va hazilomuz ohangda: “Eyy, ishning onasini…” deb eshikni ochardi. Bu holat har kuni takrorlanar edi.
Bir kuni esa vaziyat o‘zgardi. Aktrisa eshikni taqillatib, o‘sha gapni hazil aralash o‘zi aytdi.
Bu turmush o‘rtog‘ining kulgiga sabab bo‘ldi va o‘sha kundan keyin bu gap boshqa qaytarilmadi. — Agar hayotda hazilni inkor qilsangiz, u juda jiddiylashib ketadi, — deydi Muqaddas Xoliqova.
— Ba’zan oddiygina bir hazil yoki kulgili gap muammoni yumshatishga yordam beradi. Aktrisaning bu soddalik va samimiyat bilan aytgan so‘zlari oilaviy murosada hazilning naqadar muhimligini anglatadi.
