Salman Xon 60 yoshni qarshi oldi
Hind kinosining mashhur aktyori Salman Xon bugun, 27-dekabr kuni o‘z tavallud kunini nishonlamoqda. Bu haqda Zamin.uz xabar berdi.
U bu yil 60 yoshni qarshi oldi. Salman Xonning to‘liq ismi Abdul Rashid Salim Salman Xon bo‘lib, u 1965-yil 27-dekabrda Hindistonning Madhya-Pradesh shtatidagi Indaur shahrida tug‘ilgan.
Deyarli 40 yillik faoliyati davomida u 100 dan ortiq filmlarda rol ijro etgan va Bollivudning eng muvaffaqiyatli aktyorlaridan biriga aylangan. Salman Xon faqat ijodiy faoliyati bilan emas, balki shaxsiy hayoti bilan ham ko‘pchilikning e’tiborida.
U hali ham rasman uylanmagan va Hindistonda “eng talabgir bo‘ydoq” sifatida tanilgan. Aktyor nafaqat san’at sohasida, balki xayriya ishlari bilan ham faol.
U tashkil etgan “Being Human” jamg‘armasi orqali ko‘plab ehtiyojmand odamlarga yordam berib kelmoqda. Jamg‘arma ta’lim va sog‘liqni saqlash sohalarida muhtojlarga ko‘mak ko‘rsatish bilan shug‘ullanadi.
