Hande Erchel sog‘lig‘i borasidagi xavotirlarga javob bermadi
Turkiyaning mashhur aktrisasi Hande Erchel so‘nggi paytlarda yana muxlislar diqqat markazida. Bu haqda Zamin.uz xabar berdi.
Yaqinda u Vogue jurnali uchun maxsus fotosessiyada ishtirok etdi va suratlarni ijtimoiy tarmoqlardagi sahifasida e’lon qildi. Ammo bu suratlar muxlislar orasida turli munosabatlarni keltirib chiqardi.
Ko‘pchilikning e’tibori aktrisaning uslubidan ko‘ra, uning juda ozib ketganiga qaratildi. Foydalanuvchilar uning salomatligi borasida xavotirli fikrlar bildirishdi.
Ularning ayrimlari aktrisaning juda xasta ko‘rinayotganini, yuzida charchoq alomatlari borligini ta’kidlashdi. Hattoki, ba’zi izohlarda uning bu holati anoreksiya bilan bog‘landi va muxlislar aktrisani shifokorga murojaat qilishga chaqirishdi.
Shunga qaramay, Hande Erchel bu boradagi tanqid va xavotirlarga javob bermadi. Uning sog‘lig‘i haqidagi shubhalarga esa opasi Gamze Erchel o‘z munosabatini bildirdi.
Gamzening so‘zlariga ko‘ra, Hande hozirda o‘zini yaxshi his qilmoqda. Ular yaqinda oila davrasida yoqimli ta’til o‘tkazishganini ham aytib o‘tdi.
Ma’lumot uchun, Hande Erchel 1993 yil 24 noyabrda Turkiyaning Balikesir viloyati Bandirma shahrida tug‘ilgan. U ikki farzandli oilaning kichik farzandi bo‘lib, opasi Gamze Erchel ham aktrisa va model sifatida tanilgan.
Hande “Qalbim eshigini qoq”, “Halqa”, “Azize” kabi seriallar orqali mashhurlikka erishgan. So‘nggi yillarda esa u moda sohasida ham faoliyat yuritib, ijtimoiy tarmoqlardagi katta auditoriyasi bilan inflyuyenser sifatida tanilgan.
