Sevinch Mo‘minova: "Ajrashgan otalar farzandlarini unutmasin"
Xonanda Sevinch Mo‘minova o‘zining navbatdagi intervyusida ajrashgan, lekin farzandlariga loqaydlik qilayotgan otalarga murojaat qildi. Bu haqda Zamin.uz xabar berdi.
U bu gaplarni shunchaki maslahat sifatida emas, balki o‘zining hayotiy tajribasiga asoslanib aytayotganini ta’kidladi. “Ajrashgan bo‘lsangiz ham, farzandlaringizni unutmaslik kerak.
Ular sizning avlodingiz, sizning bir bo‘lagingiz. Ayniqsa qiz farzandlarga mehr berish juda muhim.
O‘g‘il bolalarga ham albatta e’tibor qaratish kerak. Ammo mehrsiz farzand ulg‘ayganda, uning ta’siri qaytar bo‘ladi.
Pushaymon bo‘lib qolasiz. Men bu gaplarni o‘z hayotimdan ko‘rib, bilib aytayapman,” — deydi xonanda.
Sevinch Mo‘minovaning so‘zlariga ko‘ra, ayrim otalar vaqt o‘tib o‘z qilmishlariga afsuslanadi, lekin kech bo‘ladi. “Bir kun kelib ko‘z yosh to‘kasiz, vijdoningiz qiynaydi, lekin o‘sha paytda ortga qaytishning iloji bo‘lmaydi,” — deya ogohlantirdi san’atkor.
Xonanda shuningdek, farzandlarga mehr berishning nafaqat ma’naviy, balki ruhiy va ilohiy barakasi borligini ham ta’kidladi: “Farzandga qilingan har bir yaxshilik, mehr, yordam Olloh tomonidan mukofotlanadi. Mehribon otaga rizq ham, baraka ham yog‘iladi.
Bunday odam qariganda xor bo‘lmaydi,” — dedi u. Sevinch Mo‘minova o‘z chiqishini ta’sirli misol bilan yakunladi: “Kichkinaligidan mehr ko‘rgan qiz ulg‘ayganda: ‘Onam va otam ajrashsa ham, otam meni hech qachon tashlab ketmadi,’ deb otasiga xizmat qiladi.
‘Dadajon,’ deb jonini beradi,” — deya xonanda ko‘zlaridagi hissiyotlarni yashira olmadi.
