O‘zbek kinosi xalqaro maydonga chiqishga tayyorlanmoqda
"O‘zbekiston – 2030" strategiyasi doirasida milliy kinematografiyani yangi bosqichga olib chiqish va xalqaro maydondagi nufuzini oshirishga qaratilgan keng qamrovli rejalar ishlab chiqilmoqda. Bu haqda Zamin.uz xabar berdi.
Ushbu strategiya asosida o‘zbek kinosining nafaqat ichki bozorda, balki xalqaro miqyosda ham raqobatbardoshligini ta’minlash ko‘zda tutilgan. Rejalarga ko‘ra, milliy filmlar dunyodagi eng mashhur 10 ta internet platformasiga joylashtiriladi.
Bu orqali o‘zbek filmlarini turli mamlakatlardagi tomoshabinlar osonlik bilan ko‘rishi mumkin bo‘ladi. Shu bilan birga, kino mahsulotlari ishlab chiqarish hajmini bosqichma-bosqich oshirish ham rejalashtirilgan.
2024–2030-yillar davomida mamlakatimizning uch ming yillik tarixini, buyuk ajdodlarimizning madaniy va ilmiy merosini yorituvchi 50 ta yirik kinoloyiha amalga oshiriladi. Ushbu filmlar xalqaro kinofestivallar va telekanallar orqali namoyish etilib, o‘zbek madaniyatini dunyoga tanitadi.
Bundan tashqari, milliy qahramonlar obrazlarini ommalashtirish maqsadida 59 ta multiplikatsion film yaratilib, internet platformalari va televideniye orqali yosh avlodga taqdim etiladi. Bu filmlar orqali bolalarga milliy qadriyatlar va tarix zamonaviy formatda yetkaziladi.
Xalqaro miqyosda o‘zbek kinosini targ‘ib qilish uchun 54 ta film turli kinofestivallarda namoyish etiladi. Kino sohasiga 2,5 million dollar investitsiya jalb qilish va milliy kino mahsulotlari eksportini 10 million dollarga yetkazish rejalashtirilgan.
Shuningdek, ijtimoiy-ma’rifiy yo‘nalishdagi loyihalar ham e’tiborda: harbiy-vatanparvarlik mavzusida 11 ta film, jadidchilik harakati namoyandalariga bag‘ishlangan 6 ta badiiy-publitsistik film ishlab chiqariladi. Mazkur chora-tadbirlar milliy kino mahsulotlari sifatini oshirish, ularni xalqaro bozorlarga olib chiqish va iqtisodiy samaradorligini kuchaytirishga xizmat qiladi.
