Bobur Yo‘ldoshev: Ayollarni endi erkak emas, internet o‘zgartiryapti
Aktyor Bobur Yo‘ldoshev erkakning baxti nimada ekanligi haqidagi savolga javob berar ekan, oilaviy baxt masalasida ayolning o‘rni juda muhim ekanini alohida ta’kidladi. Bu haqda Zamin.uz xabar berdi.
Uning fikricha, erkakning haqiqiy baxti ko‘pincha uning yonidagi ayolga bog‘liq bo‘ladi. Shu bilan birga, aktyor bugungi kunda jamiyatdagi ayollar haqidagi fikrlarini ham ochiq aytdi.
"Bugun ayollar juda o‘zgarib ketgan", — deydi Bobur Yo‘ldoshev. Unga "Ayollarni kim o‘zgartirdi?" degan savol berilganda, aktyor hech ikkilanmay "Internet" deb javob berdi.
Uning so‘zlariga ko‘ra, avvalroq ayolni erkak o‘zgartiradi, degan qarash keng tarqalgan edi. Biroq hozirgi davrda vaziyat butunlay boshqacha.
"Hozir ayollarni erkak emas, internet o‘zgartiryapti. Chunki internetda juda ko‘p psixologlar, turli intervyular va maslahatlar bor.
Bu esa ayollarning fikrlash tarziga kuchli ta’sir ko‘rsatmoqda", — deya qo‘shimcha qildi aktyor. Uning fikricha, bu o‘zgarishlar oilaviy munosabatlarga ham bevosita ta’sir qilmoqda.
