Kumush Razzoqova: “Qo‘shiqlarimni boshqalar kuylamasin”
Xonanda Kumush Razzoqova o‘z shaxsiy hayoti haqida kamdan-kam hollarda oshkora gapiradigan san’atkorlardan biri hisoblanadi. Bu haqda Zamin.uz xabar berdi.
Uning ismini otasi Abdulla Qodiriyning mashhur “O‘tkan kunlar” romanidagi Kumush obraziga havas qilib qo‘ygan. Xonanda Rossiya fuqarosi, aktyor va musiqachi Vladimir Baramikov bilan turmush qurgan, biroq ular yigirma yil birga yashagach, ajrashishgan.
2013 yilda Kumush Razzoqova og‘ir avtohalokatga uchrab, jiddiy jarohat olgan. Bu voqea natijasida u ikki oy davomida yurish imkoniyatidan mahrum bo‘lgan.
Uning ijodiy faoliyati “Sado” guruhida boshlangan. Biroq guruh ma’lum sabablarga ko‘ra tarqalib ketgan.
Hozirda esa xonanda deyarli ijod qilmaydi. Intervyularida u sahnada yoshlarga o‘rin bo‘shatish vaqti kelganini ta’kidlaydi.
Kumush Razzoqova o‘z qo‘shiqlarini boshqa xonandalar tomonidan ijro etilishiga qarshi ekanligini ochiq aytadi. “Men hali tirikman.
Qo‘shiqlarimni boshqa san’atkorlar kuylashiga ruxsat bermayman”, — deydi u. Shuningdek, u har bir san’atkorning faoliyati boshlanishi va tugashi tabiiy ekanini qayd etadi: “Kun kelib sahnani tark etib, yoshlarga yo‘l berish kerak.
Qariganda ham reyting talashib, kurashayotgan xonandalarni tushunmayman. San’atda erishish mumkin bo‘lgan narsalarga erishildi, endi yoshlarga imkoniyat berish kerak”.
Shu bilan birga, Kumush Razzoqova o‘zining eng katta kamchiligi sifatida kurashuvchan emasligini ochiq tan oladi. “Bu kamchiligimni haligacha yenga olmaganman.
Oson taslim bo‘laman”, — deydi u. Xonandaning “Yomg‘ir”, “Men seni hech kimga bermayman”, “Oq bulut”, “Saraton”, “Ikki daraxt” kabi qo‘shiqlari hali ham o‘zbekistonlik muxlislarning yuragidan chuqur joy egallab kelmoqda.
