Lola Yo‘ldosheva san’atdan rasman chekinishini e’lon qildi
Lola Yo‘ldosheva – o‘zining noodatiy ijodi va sahnadagi xarizmasi bilan tanilgan xonanda va aktrisa. Bu haqda Zamin.uz xabar berdi.
U 1985 yil 4 sentyabrda Samarqand shahrida tug‘ilgan. Uning otasi Ravshanbek Yo‘ldoshev uzoq yillar davomida ichki ishlar tizimida tergovchi bo‘lib faoliyat yuritgan.
Lola san’atga bo‘lgan qiziqishi sabab yoshligida ijod yo‘lini tanlagan. Lola dastlab 10 yoshida Shiribom reklamasida ishtirok etib ommaga tanilgan.
Uning professional ijodiy faoliyati esa 2002 yilda “Netayin” qo‘shig‘i bilan boshlangan. Keyinchalik u Rossiyalik prodyuser bilan hamkorlik qilib, “Maya” taxallusi ostida ijod qilgan.
2004 yilda Lola “Sevinch” filmida o‘zining ilk yirik rolini ijro etdi. Uning aktrisalik mahorati tomoshabinlar va mutaxassislar tomonidan yuqori baholandi.
2005 yilda suratga olingan “Kelgindi kuyov” filmidagi roli unga katta shuhrat olib keldi. Shundan so‘ng, Lola bir nechta filmlarda muvaffaqiyatli rollar ijro etdi.
2005 yilda Lola tadbirkor Shohruh bilan oila qurib, san’atdan bir muddat chekinadi. Ularning ikki farzandi – Shahinabegim va Shohdiyor dunyoga kelgan.
Ammo 2011 yilda Lola va Shohruh ajrashishadi. Shu yili u “Senga” nomli konsert dasturi bilan shou-biznesga qaytadi.
2015 yilda Rayhonning konsertida “Ko‘nikmadim” duetini ijro etganida, ochiq qizil libosi sabab “O‘zbeknavo”dan ogohlantirish oladi. 2017 yilda Lola ikkinchi bor oila quradi va bugungi kunda uch nafar farzandning onasidir.
2025 yilda Lola o‘zining so‘nggi konsertini o‘tkazib, san’at sahnasidan chekinadi. U ijtimoiy tarmoqlardagi faoliyatini ham yakunlab, Instagram sahifasini tozalab, muxlislariga “Yana ko‘rishguncha” deya qisqa murojaat qiladi.
